Tausdi mân as wahsamabin waiku 1970 sipin kau, muih al as wasakin Takaln wina ditauh kau kiuna diauh inin tada, kun yaln dawak mimin wana bin 6 sip duwa karak.
Ditauh papas kau û bin as yam wada kakana, aln laklauaput kayulna man akat sak awah yang laih ditauh kutnasi usnit winik kalpuna bang kidi bûas îrakpa kaput laih yahan namangh û kau mawarang, dawak muinh wana laklau yuldakana ais puyun kaiwarang pâ û kau?
Dawak al laklau apat kayulna yang nûawas yang, ais puyun kau aiwarakpa kun îtas yang kat laih pukta kau aiwara ki, dawak muih wana dai kidi yamduwada apat yulna, kun pân adi yabananghni ki diauh dudutni manh bang ki yana kaswarang dawak aln laklau apat kayulna yang mâna duyaunik sip awas yang nayas kau yauwing kun, muih wana kidi dawas yulwa kat talwada dukiuna witin karak.
Yaknunuhdada wiwak ditauh kutnasi kalpuwada kakaida bang kat dakana kat, muih al laklau kayulna akat bang awanauh yang îna yawayang kikirarang kat usnit winik tayang kun nai laih distas awaraki, kapat yulwada kiuna, yaln dai kidi mim wana bin karak kamanh sak dai pan bukna as minit kau.
Maih wana dai talwak alh kidi kiwas kat liknatal bûas laklawak mimbin wana kau apat kayulna: mâ danik tayang adi panan minit akat sakawah yang papah kau yan talnik tayang dawak aiwanarak taim kau mâ duyaunik tayangna, mimbin wana kidi kaidada yulwadai alas dakiwarang awas yuln kau, kun nanan kidi isning muruswada dakiuna kiuna dawak aln karak kalpapakna, tulwada aina taim lap dai. waralaih wawalna, wawalna yayakwas dadana, kaln yaknuh dana laih tatalna 5:00 mâsan kat kiuna aln karak mimbin wana sak dai pân kau dî lap dai, wawalna nunit balna bitik kau kun yayakwas dana kaln sau kau putna balna kamanh talwa dai, nanan usnit kau wiwada kiuna kidi dawak walwada kiuna kat tatalna was bin as kau bukna, wasan bin kung kat kaln putna kidi disna muih as bik nuawas dai angkat sak dai pa.
Nû awas mayang di dutni as laklau malna pa, awas kat diauh dutni as laklau kasna pa, kuldi karus as laklau pa.
Yuln adi Wasakin muinh balna isningna kau saki, muinh wana bin disna kidi papan, nanan warman kat Wasakin kau bangki, minikna diswas ki, dibalna kalahna kidi.
Kidi man wina kidi subangni ayangni papakna “mimbin disna subangni”.
LEER TAMBIÉN Realizan actividades de limpieza en centros escolares previo a las vacaciones
